Sun, 05 Apr 2009 16:21:02 +0200 http://korrika.org/ Ongi etorri eu http://korrika.org/images/ongietorri.png http://korrika.org/ jose.j-s@aek.org http://korrika.org/index.php?name=News&file=article&sid=238 Gasteizko Hala Bedi irratira etorri gara azken kronikatxoa idazten. Irratikoak Kutxi kalean dabiltza zuzeneko programa egiten. Korrika orain ordu bi heldu da. Gasteiz azkenean. Ongi etorri! Baina lehenago, goizaldean, Bergara Urretxu Legazpi Oñati Eskoriatza. Mirentxu laguna etorri zait akordura. Egonean egoteko eskubidea aldarrikatzen du, korrika egin gabe bizitzeko aukera. Bizitzari galga jartzeko beharra. Durana herrira iristean, orain egun batzuk kaieran idatzi nituen apunteak gogoratu ditut: ez al dio Korrikak, hain zuzen ere, hari heltzen? Egonean korrika, Korrikan egon. Korrika badabil eta badago. Abiadura Handiko Gizartean kadentzia motela dakar Korrikak. Hausnartzeko aukera. Zaramaga Abetxuku Lakua Zabalgana Ez gaude nekaturik. Idazteko batere gogorik ez dugun arren, aitzakia ez da nekea. Kanpoan festa handia dago eta parte hartu nahi dugu. Porru eginda helduko ginela uste genuen. Baina usteak erdi ustel. Ez dago boz lakarrik, ezta amatutako begitarterik ere. Ezin hobeto ailegatu gara. Eta sasoi ederrean bagabiltza ere, ez diogu atzera ere lasterketa egiteari egingo. Beste zeregin bat dugu hemendik aurrera. Gaur bertan, Korrika Gasteizko Andra Mari Zuria enparantza heldutakoan, Pirritx, Porrotx eta Mari Motots pailasoek altxor bat topatzeko gonbita egin digute: «Ez da ezkutuan dagoen altxor horietakoa, lurpean edo uharte bakarti batean gorderik dagoena, ez da filmetakoa ere. Altxor hori egiazkoa da, eta gu denona, denok elkarrekin partekatzeko modukoa». Euskara fragmentaturik ikustera behartzen gaitu sarri egoera soziolinguistikoak. Puzzlea izan bada, noski, baina ez omen dago modurik piezak elkarren ondoan jartzeko. Korrikak kontrakoa erakusten digu. Tuteratik Gasteiza puzzlea aise osatu da. Jakina da gure hizkuntzaren ezagupenari edo erabilerari dagokionez diferentzia handiak daudela leku batetik bestera, baina, Pirritx, Porrotx eta Mari Mototsek ondo adierazi dutenez, ez dugu uharte bakartirik bistaratu. Lasarteko lagunek gurasoei batez egin diete berba gaur. Andra Mari Zuria plaza lepo bete dugun guztiok (gurasoak izan zein ez) ulertu dugu Korrikako lekukoaren barnean zegoen mezua. 2.504 kilometro birikak bota beharrean lasterka egin ondoren, errazago konprenitu dugu: «Partekatuz bakarrik hartzen du bere benetako balioa hizkuntzak». Korrikak ere partekatzean bakarrik hartzen du balioa. Eta hori ederto ikasi dugu azken hamaika egun hauetan Euskal Herriko bideetan barna. Mila esker, bada, Euskal Herriko korrikalari guztiei. Mila esker eta besarkada bana Korrika honetako antolatzaileei, furgonetetako kideei eta, batez ere, prentsa-taldeko lagunei. Orain, urte biz, lekukoa ezpainetan eroango dugu. Lasterketa errazagorik! Korrika 16 amaitu egin da. Gora Korrika 17! Sun, 05 Apr 2009 16:21:02 +0200 http://korrika.org/index.php?name=News&file=article&sid=237 ­­ ­Azken kilometroak ­ Km Lekua Eramailea Ordua 2430­ Eskalmendiko zubia ARAMAIOKO UDALA 08:56:05 2431 Bergarako atea ARRASATEKO ESKOLA POLITEK LANGILEAK 09:02:35 2432 Bergarako atea ARRASATEKO ESKOLA POLITEKNIKOKO IKASLEAK 09:09:05 2433 Duna garagardotegia HIRU 09:15:35 2434 Gamarrako atea/ Repsol GEU 09:19:29 2435 Gamarrako Atea Alfombras Volare AHAZTUAK 09:23:23 2436 Madril kaleko errotondonda IKASBIDEAKO GURASOAK 09:27:17 2437 Luxemburgo kalea (Vital Kutxa) EGI 09:30:32 2438 Paris Kalea/ Bruselas hiribidea GASTEIZTARRAK BLUSA TALDEA 09:33:47 2439 Andalucia/Valladolid errotonda LORATEGI-AKETEGI TABERNAK 09:37:02 2440 Valladolid/ Nafarroako errege-erregina Errotonda LANTZALE 09:40:02 2441 Zaramagako Telefonica ARABAKO PSIKIATRIKOKO LANGILEAK 09:43:02 2442 Santa Isabel Hilerria JESUS OBRERO 09:45:58 2443 Agirrelanda kalea HAMARRETAKO ELKARTEA 09:49:13 2444 Udaltzaingoa SUHILTZAILEAK 09:52:28 2445 Agirrelanda kalearen bukaera MERCEDESEKO LANGILEAK 09:56:22 2446 Abetxukoko zubia ATSEDEN TALDEA 09:59:37 2447 Abetxuku/ Kristo kalea TXALAMAKO 10:02:32 2448 Abetxuku. Los Nogales MAGISTERITZA ESKOLAKO IRAKASLEAK 10:05:47 2449 Abetxukoko zubia HAURRESKOLAK 10:09:02 2450 Onaindia gasolindegiaren errotondan DIOCESANAS IKASTETXEA 10:12:17 2451 Juan Crisostomo de Arriaga BRETOIAK, "AR REGADEG" 10:15:32 2452 Gran Hotel Lakua AERNOVAKO LANGILEAK 10:18:14 2453 Bartzelona/Zadorra Euskaltegian UMANDI IKASTOLA 10:21:10 2454 Andia Mendia/Donostia EUSKO JAURLARITZA 10:24:25 2455 Blas de Otero La Vitoriana TOKI EDER 10:27:40 2456 Antonio Machado Bideocluba Broadway BARRUTIA IKASTOLA/MENDEBALDEA INSTITUTUA 10:30:55 2457 Antonio Machado EUSKO JAURLATZAKO LANGILEAK 10:34:10 2458 Escolapias Parean VITAL KUTXA, LANGILEAK 10:37:25 2459 Huetos hiribidea IGARABA 10:40:40 2460 Apeztegiaren atean BARTZELONAKO EUSKAL ETXEA 10:44:14 2461 Lan Conchas errotonda LOHANDIA ELKARTEA 10:47:10 2462 Etxezarra kalea ELECTRA VITORIA 10:50:25 2463 Mediterraneo Hirib. ARMENTIA IKASTOLA 10:53:40 2464 Zabalgana Hirib. BASKONIA 10:56:55 2465 Armentia ikastola EZTANDA NORTE 11:00:10 2466 Gaztelako atea ALAVES 11:03:25 2467 Gaztelako Ateko zubia CAJA LABORAL BAZKIDEAK 11:06:40 2468 Gobernu Zibilaren atzekaldea GASTEIZKO GAZTEAK 11:09:55 2469 Osakidetza (Araba Kalea) OLABIDE 11:13:10 2470 Zumakera hiribidea OLABIDE LANGILEAK 11:16:25 2471 Hegoalde Gizarte Etxea SAUNIER DUVAL 11:19:40 2472 San Kristobal eliza SAUNIER DUVAL LANGILEAK 11:21:50 2473 Castro Urdiales/ Eroski NAIPES FOURNIERREKO LANGILEAK 11:24:00 2474 Las Trianas Zubia EKIALDE IKASTETXEA 11:26:10 2475 Estibalizko Andre Maria ELKAR MEGADENDA 11:29:25 2476 Judimendi/Santiago JUDIMENDIKO JOALDUNAK / AUZO ELKARTEA 11:32:40 2477 Arana Kalea ARANTZABELA/ GUEREÑU 11:35:55 2478 Los Herran 35 LOS HERRAN/SAMANIEGO IKASTETXEAK 11:39:10 2479 Iparralde 2 atean KOLDO MITXELENA/ ODON DE APRAIZ 11:42:25 2480 Simon de Anda Eroski UDALEKO LANGILEAK 11:45:40 2481 Musika kontserbatorioa AFA-GOFEKO LANGILEAK 11:48:55 2482 Kolonbia kalea San Andres eliza LA BRASILEÑA / LA TOSTADORA 11:51:03 2483 Mexico UNAMUNO IKASTETXEA 11:53:12 2484 Txagorritxuko Osasun Zentroa NESTLE 11:55:25 2485 Fdz de Leceta BLUSEN ELKARTEA 11:57:33 2486 Serafin de Ajuria TXOSNEN BATZORDEA 11:59:38 2487 Abendaño kalea / Adriano VI UEMA 12:01:35 2488 Luis Heinz/ Lovaina EUSKO ALKARTASUNA 12:03:44 2489 Katedral berria ARABAKO FORU ALDUNDIA 12:05:52 2490 Ramon y Cajal ARALAR 12:08:05 2491 M. Iradier/ San antonio EZKER ABERTZALEA 12:10:14 2492 M. Iradier /SUR EAJ 12:12:19 2493 Pio XII/ Florida kalea EMAKUNDE 12:14:16 2494 Los Herran/ Gobernu militarra GASTEIZKO UDALA 12:16:13 2495 Los Herran/ Askatasuna kalea BERRIA 12:18:10 2496 Los Herran Autobus Geltokia AMNISTIAREN ALDEKO MUGIMENDUA 12:20:07 2497 San Prudentzio residentzia (Francia Kalea) UDALBILTZA 12:22:04 2498 Francia/Erregearen atea UDALBIDE 12:23:41 2499 Dendaraba EHIGE 12:25:26 2500 Ortiz de Zarate/ Florida SINDIKATUAK 12:26:50 2501 Florida kalea/ San Antonio IKASTOLEN KONFEDERAZIOA 12:28:14 2502 San Antonio/General Alava KONTSEILUA 12:29:38 2503 Prado AEK 12:31:36 2504 Andra Mari zurian 12:33:21 ­­ Sat, 04 Apr 2009 23:00:49 +0200 http://korrika.org/index.php?name=News&file=article&sid=236 Korrika sanbodromo bihurtu zenekoa Zalla Gallarta Trapaga. Ongi etorri! Lehengo batean aipatu nuen: Korrikan lasterka egitea bezain garrantzitsua da itxarotea. Auzokoekin, lankideekin edo lagunekin itxaroten dugu. Korrikak badauzka geltokiak, itxoitearen geltokiak. Lekuko aldaketetan islatzen da lasterketaren aniztasuna. Lekuko aldaketak hamaika puska egiten ditu tropelaren itxurazko batasuna. Gaur bestelako itxarotea gertatu zaigu. Txirrindulari-lasterketa zegoen iragarrita Zornotzan. Arratsaldeko seiak aldera ailegatu gara herrira. Polizia Korrika geldiarazten ahalegindu da seguritatea ziurtatze aldera. Baina Korrika ez da geratu. Ordu laurden batez behinik behin, Ino lagunaren perkusio taldearen erritmopean, lasterkariek Patata izenez ezaguna den Andres Nagelen eskultura erraldoiaren inguruan segitu dute korrika eta saltoka. Une batez, Rio de Janerion edo Bahian genbiltzala begitandu zaigu. Baina Zornotza baino lehen, Portugalete Sestao Barakaldo Erandio Zamudio. Korrikaren mintzoa ozen entzun da Larrabetzu herri txikian. Goizeko hamarretan sartu gara. Hura jende mordoa! Jakina denez, masek badauzkate lengoaia propioa eta kode bereziak. Horixe dio behintzat soziologiak. Eta Korrikan ere ematen da legea, noski: berba egiten duenean, jarrera jakin batzuk agertzen ditu lasterkarien taldeak han eta hemen. Hala ere, tokian tokiko hizkerak ere badaude. Eta Larrabetzun berezia sumatu dugu. «Korrikalari gehiago dabiltza biztanle baino», komentatu du prentsa taldeko kide batek tropel luzea ikustean. Galdakao Basauri Arrigorriaga. Gabi dator gurekin. Lehengo egunean Guardian barrena korri egin zuen; atzo Bilbon; goizaldean Portugaleten; orain Usansolon; eta bihar Gasteizen. Sasoi ederra, gero! Sasoia, baina, ez dago hanketan bakarrik. Buruan eta bihotzean dago batez ere. Atzo Bilboko Santutxu auzoan, txandaka, maldan gora eraman zuten lekukoa gurpildun aulkietan zihoazen korrikalari bik. Gurpilei eragingo bazioten, lekukoa ziztu bizian pasa behar zuten esku batetik bestera. Une ederra izan zen, ederra izan zenez. Baita joan den larunbatean Lekunberrira bidean ere. Makulu baten laguntzaz zebilen mutil herrena bildu zitzaigun metro batzuk egiten. Jo eta hautsian zihoan maldan behera. Lasterraldia amaitzean makulua goratu zuen: «Gora Korrika!». Euskara ez da maingutuko, alafede. Ugao Zeberio Areatza. Arratiara egin dugu Ugaotik. Zazpi edo zortzi zaldik eta traktore handi batek lagundu digute Zeberiora. Zaldiak aurretik, gibeletik traktore koloretsua. Zeberiora iristean beste traktore txikiago bat hartu dio lekukoa besteari; lurra jorratzeko edo goldatzeko txiki horietako bat. Gainean txalapartariak doaz. Ttipi-ttapa, titpi-ttapa, hirurak eta erdietan heldu gara Areatzara. Herritar ugari daude zain. Baita, siestari uko eginda, AC/DC taldearen kontzertura joan behar duten guztiak ere (goraintziak denoi eta ondo pasa). Korrikalarien artean Nikola umea bistaratu dut. Gabonetan etorri zen Errusiatik. Dagoeneko hasi da euskaraz hitz egiten. Arantzazura sartu aurretik, Illart Gumuzio igorreztarra bertsotan aritu da lekukoa zeroala. Esku batean mikroa, bestean lekukoa eta korrika eroan. Ez da erraza, sinetsidazue. Arratiera eraman du bertsoetara. Aldarriak, askotan geure buruari egiten diogun galdera eta ondoren datorren erantzuna ekarri dizkit gogora: «Zein da euskara politena? Entzuten dena, dudarik gabe». Eta nik neuk sokatik tira egin eta Korrikara bihurtu dut: «Zein da kilometrorik politena? Non? Noiz?». Neurriko erantzuna eskatzen du, noski. Iurreta Durango Abadiño Atxondo. Poliki-poliki, geratu gabe, Durangaldera sartu gara. Abarkas bertsolariak abegi egin digu korrikalari guztien izenean. Milaka lagun dira Iurretan eta Durangon. Mallabira goaz. Ermura goaz. Eibarrera. Soraluzera. Korrikak ordu bi emango ditu gaur Gipuzkoan barna. Neronek, baina, Urduñan daukat gogoa. Urduñan? Asteazkenean Araban kokatu nuen. «Ez al dakik Bizkaia dela?» galdetu didate. Jakingo ez dut, ba! Familia daukat han; familia handia Amurrion eta Urduñan. Eta ordu honetan egunero burua purea lez, bigun-biguna. Luze gabe lo egitera joango gara. Gasteiz hurbil sumatzen dugu. Agian, lotara baino lehenago, Durangon egingo dugu geure Korrika xelebrea. Barruko kilima kendu beharrean gaude.­ LUTXO EGIA (Santander, 1969) Soziologian lizentziatua eta kazetaritzan aritua, e­gun literaturan dihardu. Hainbat ipuin eta poema ditu idatziak, baina gehienbat nobelan saiatu da. Horrela, Kalezuloko animalien izenak (Pamiela, 1999) haur literaturako poema liburuaz gain, Paperezko hegazkinak (Susa, 2002), Ezker hanka falta zuen (Susa, 2005) eta Zubigilea (Susa, 2007) nobelak argitaratu ditu. Nontzeberri.com kultura atariaren sortzailea ere bada. ­ Sat, 04 Apr 2009 22:53:06 +0200 http://korrika.org/index.php?name=News&file=article&sid=235 Inoizko Korrikarik luzeenaren azken txanpan sartu gara. Bilbo erdian 2000. kilometroa bete du jada euskararen aldeko lasterketa erraldoiak eta goizean goiz Barakaldotik pasatu ostean Erandiora joko du, baina ez lasterka, txalupan baizik. Han kilometro batzuk egin ostean Txorierri eskualdera joko du: Erandio Goikotik sartuko da goizeko 7:45 inguruan, eta handik Larrabetzurantz abiatuko da. Tartean Sondika, Derio, Zamudio eta Lezama igaroko ditu, herri eta txoko guztietatik pasatuz, eta bat egingo du zain izango dituen euskaltzale guztiekin. Besteak beste, Goierri Sokatira Taldeak (txapelduna iaz Suediako mundialean) lekukoa eramango du Erandion, eta Txorierriko ELA sindikatuak Derion. Halaber, irrikan gaude Kukubiltxo Antzerki Talde larrabetzuarraren aurtengo sorpresa zein den ikusteko, eta badakigu Zamudioko musika taldeko kideek trikitixa eta panderoekin itxarongo dutela Korrika. Aipatzekoa da bestalde, Txorierriko futbol taldeek beraien partidetako ordutegiak aldatu dituztela umeek Korrikan parte hartzeko aukera izan dezaten. Gainera, txorierritarrek ekitaldi sorta zabala antolatu dute Korrika pasatu osterako. Indarrak berritzeko, hamaiketakoa eskainiko da herri guztietan eta horren ondoren kultur ekitaldiak egingo dira. ­­Hego Uribera egingo du jauzi ­gero Korrikak, eta Galdakaora goizeko hamarrak aldera sartuko da. Basaurin bi ordu beranduago sartu­ko da gutxi gorabehera. Galdakaon, K2000 ekoizpen etxeak, Urreta eta Gandasegi eskolek, EAJk, Udalak eta Udal Euskaltegiek eramango dute lekukoa beste askoren artean; eta Basaurin, esaterako, herri mugimenduetako ordezkariek eta El Social antzokiak. Basauriko Danbolin Txistu Taldeak goiz parte osoa emango du herria alaitzen, eta gero 2208. kilometroan lasterka egingo dute. Arratiara bidean, Arrigorriaga, Ugao, Zeberio, eta Arteatik igaroko da Korrika. Lekuko eramaileen artean, besteak beste, Ugaoko, Arrankudiagako eta Zeberioko Udalak; Arrigorriagako eta Ugaoko eskolak; langileak zein enpresak eta makina bat elkarte eta kirol talde: Abarrak Euskara Elkartea, Padura Mendi Taldea, Ugaoko Futbol Taldea… Behin Arratian sartuta, Zeanuriko gazteek, Peña Gorbeak eta Luis Prieto peñak hartuko dute lekukoa Arteatik Dimarako bidean. Diman, bertako esku pilota taldea, Dimako ezker abertzalea, Dimako EAJ eta Udala izango dira lekuko eramaileetako batzuk. Areatzara egin (ezker abertzalea, Areatzako Udala, guraso elkartea) eta berriro Artean sartuko da (Arteako EA, Udala, Arratiako bertso eskola…), Arantzazu igaro eta Igorrera gero, laurak baino lehen heltzeko. Igorren, ehunka euskaltzaleren aurretik, lekukoarekin Udala, eskola, ezker abertzalea, Etxerat, Zekorrak errugbi taldea, futbol taldea... Lemoara bazkaria “bajatzeko” ordu aproposean iritsiko da, lau eta erdiak inguruan, eta bertako Musika eskolak, Udalak, Gaztetxeak eta gainontzekoek dantza taldearen erritmoari segitu beharko diote. Iurretan Izar enpresak eramango du lekukoa, eta Durangon arratsaldeko 18:20 inguruan sartuko da Korrika (Plateruena Kafe Antzokia, LAB, Berbaro, Aralar, Durango 1936/Ahaztuak…). Abadiñotik (EHNE, Euskara Elkarteen Topagunea…) Elorriora egingo du gero zortziak laurden gutxitan sartu eta Berrizera bidean zortzi kilometroko ibilbidea osatzeko. Elorrion lehenengo kilometroa Udalak egingo du, eta 2319. kilometroa, AEK-ko ikasleek. Ilundu orduko pasatuak izango ditu Korrikak bere ibilbidean Zaldibar, Mallabia, eta Ermua. Gauarekin Gipuzkoara sartuko da eta Debabarrena, Urola Garaia eta Deba Goiena eskualdeak zeharkatuko ditu: Eibar , Soraluze, Osintxu, Bergara, Antzuola, Urretxu, Zumarraga, Legazpi, Oñati, Arrasate, Aretxabaleta eta Eskoriatza. Leintz-Gatzagatik Arabara pasatuko da goizeko zazpi eta erdiak aldera, azken txanpa egiteko. Gasteizera! Fri, 03 Apr 2009 22:57:20 +0200 http://korrika.org/index.php?name=News&file=article&sid=234 GPS belaunaldian Korrikaren furgonetetan eta autoetan ez dago GPSik. Ez dago halakorik zertan erabili. Lasterketaren ibilbidea aurretiaz dator zehazturik. Urtebete lehenago aritzen dira AEK-ko lagunak zeregin horretan. Lehen-lehenik irteera eta amaiera zehazten dira. Ondoren balizko ibilbideak datoz. Eta azkenik, eskualde desberdinetako AEK-ko kideek kilometroen ezaugarriak definitzen dituzte. ­Hasierako fragmentazioak linealtasuna dakar bukaeran. Batasuna. Korrika hasi baino lehen, dena­ dago zehazturik bitakora kaiera batean. Guk geuk bitakorina esaten diogu. Beraz, Korrikan ez dugu GPSik erabiltzen. GPSak bilatu hitza ezabatu nahi du hiztegietatik. Haren xede bakarra iristea da. Etaparen amaieraren seguritatea, helmuga. Korrika kontrakoa izaki. Korrikak euskara kokatzen du Borges idazlearen mapa ezagunean. Korrika deskubritzeko irrikan dago. Bilatzeko gogo biziz. Bazter bakoitza arakatu gura du. Utikan GPSa! Jakingurak Bizkaira eroan gaitu gaur goizaldean. Aulesti Lekeitio Ispaster Ea Natxitua Gernika. Ongi etorri. Goizeko bederatzi eta erdiak aldera Foruan harrapatu dugu Korrika. Bart berandu joan ginen lotara. Lotarako orduan furgonetako lagunekin egin genuen topo. Dutxatu berriak ziren Korrikarekin bat egiteko. Mundaka Bermeo. Ongi etorri. Sollubera bidean Txabi bildu zaigu. Maldan gora tropela pixka bat urritu zaigu. Hala ere, korrikalariak ederto doaz Betagarriren kantaren esanetara. Ez nuen Txapi hemen ikusterik espero. Bilboko Alde Zaharrean topatuko nuelakoan, ni. «All iron» esan diogu batak besteari. Horrela agurtzen dugu elkar aspalditik. All iron, ongi etorri. Valladolidetik heldu berria da. «Kilometro batzuk piano-piano eta arineketan buelta». Txabi txikerra da, zabala du bizkarra, sendoak hankak. Begi erne sakonak dauzka. Belaunek hamaika buruhauste ekartzen dizkioten arren, estilo politean dabil. Kanpoan bizi denez, sartu-irten ugari egiten ditu euskararen mundura. Petoaren gainean Piotr Kropotkinen argazki txipi bat darama. «Egun dena da arau, dena xedapen, dena lege Arautzeko premia larria dago, gurpil zoro horrek xurga-xurga eginda gauzka». Pentsakor geratu naiz une batez. Zein ote da Korrikaren araua? Azken egunetako adierazpenek nahasturik naukate. Salto egin dut furgonetatik erantzunaren bila. Txabiren parean jarri naiz. Hura astiro doa, ze arin eta ondo, ezin. Ni neu ufaka, birikak bota beharrean. Boza goratu du Canon aldean: «Korrikan, lasterketa egitea da arau bakarra. Beste guztia libre». Ez da makala, kontrakoa sinestarazi gura diguten arren. Gorliz Plentzia Sopela Algorta Leioa. Ongi etorri. Bilbora ailegatu gara konturatu gabe. Txabik ez du gurekin jarraitzen, noski. Mungian laga du lasterketa. All iron elkarri esan aurretik argitu dit inoiz ez duela GPS bat ikusi. Bilbon, behinik behin, ez dugu beharko. Bilbon, Bizkaiko herri guztietan bezala, harrera ikusgarria egin diote Korrikari. Gaur hemen gelditzeko asmoa dut. Burura etorri zait Korrika utopiaren metafora dela. Ezinezkoa baita korrika egitea atseden hartu gabe, gelditu gabe. Ni neu utopiazalea izaki. Utopiak erakusten baitigu zer egina badugula. Ez dakit agian nekatuegi nabil dagoeneko. ­LUTXO EGIA (Santander, 1969) Soziologian lizentziatua eta kazetaritzan aritua, e­gun literaturan dihardu. Hainbat ipuin eta poema ditu idatziak, baina gehienbat nobelan saiatu da. Horrela, Kalezuloko animalien izenak (Pamiela, 1999) haur literaturako poema liburuaz gain, Paperezko hegazkinak (Susa, 2002), Ezker hanka falta zuen (Susa, 2005) eta Zubigilea (Susa, 2007) nobelak argitaratu ditu. Nontzeberri.com kultura atariaren sortzailea ere bada. ­ Fri, 03 Apr 2009 22:37:26 +0200 http://korrika.org/index.php?name=News&file=article&sid=233 Bizkaian hasiko du Korrika 16k eguna, Lea-Artibai eta Busturialdea artean. Eskualde horretan Ea, Ibarrangelu, Elantxobe, Nabarniz, Ereño, Gauteiz-Arteaga, Kortezubi, Arratzu, Ajangiz, Gernika, Foru, Muxika, Murueta, Sukarrieta, Mundaka eta Bermeoko Udalek eramango dute lekukoa, nork bere udalerrian. Baina horiez gain, beste asko ere izango dira Korrikari ongietorria emango diotenak, adibidez, Oizmendi telebista Kortezubin (1867); Elai-Alai dantza taldea (1870), Busturialdeko Hitza (1872), EHE, AEK eta Udal euskaltegia elkarrekin (1873) Gernikan; erraldoien konpartsa Bermeon (1887)... Mungialdera pasatzean autobus bat ere ikusi ahal izango da 1899 eta 1900 kilometroen artean, Meñakatik hurbil. Izan ere, edizio hau ezin izan da Bakiotik pasatu errepideko lanak direla eta, beraz, bakiotarrek euren Korrika egingo dute herrian goizeko 9:30ean, eta ondoren gura duen guztia autobusera igoko da Korrika “ofizialera” joan eta bertan parte hartzeko, baita eskolako ume guztiak ere. Euren hiru kilometroak bukatzen dituztenean, berriro autobusera igo eta herrira itzuliko dira. Kostalderantz egingo du berriro Korrikak ordu bietatik hurbil, Uribe Kostan barrena ibiliko baita arratsaldean Bilbon sartu arte. Beraz, Bizkaiko hiriburura iritsi baino lehen, herritar, elkarte eta erakunde askok eramango dute lekukoa, tartean ETBko Mihiluze saioan orain arte hiru bote irabazi dituen bikote bakarrak, AEK-ko irakasle Aitor eta Edortak (Urduliz, 1941 km). Gainera, Korrikaren sortzaileetako bik, Urtsa Errastik eta Joseba Kanpok Erromon eramango dute lekukoa Doble Sentido eta Invesco enpresen kilometroan (1966). Eta Leioako Txakurzulo gazte asanbladako kideek mozorrotuta eta txalaparta joz emango diote ongietorria Korrikari euren kilometroan (1975). Ia lau orduz Bilbon Korrika 16 arratsaldeko sei eta erdiak aldera sartuko da Bilbon, Enekuritik. Komite internazionalistek egingo dute hiriburuko lehen kilometroa (1981). Ia laurogeita hamar esku aldaketa egingo ditu lekukoak bertan eta, beste askoren artean, hauek beteko dituzte kilometroak: Bizkaiko Foru Aldundia, Bertsozaleen Elkartea, Etxerat, Iniciativa gitana, Bilboko Udala, Berbalaguna, sindikatuak, Athletic futbol taldea, Bilboko konpartsak, AEKren Lizardi euskaltegia bere 25. urteurrenean, Anitzak... Gaueko hamar eta laurdenak aldera eta 2042. kilometroan agurtuko du Korrikak Bilbo, Enkarterrietan barneratzeko. Baina nahi duenak aukera izango du lasterka egin ondoren Errekalde auzoko Kukutza gaztetxean hamarretatik aurrera egingo den Korrika jaian parte hartzeko. Bertan Bertso Hip-Hop multimedia ikuskizuna eskainiko da doan. Enkarterrietan Alonsotegi, Sodupe, Güeñes, Zalla, Balmaseda eta Sopuertatik pasatuta, eta barikutik larunbaterako muga ere bai, Meatzaldea zeharkatzeari ekingo dio Korrikak Muskizen (2082 km). Bertako talde, eskola, elkarte eta erakundeek hartuko dute lekukoa, baita Abanton eta Ortuellan ere. Trapagan, berriz, aipatzekoa da jende askoren artean hartzen dituztela kilometroak, kirolariak, gazteak, kultur eragileak, alderdi politikoak, ikastetxeak... Suhiltzaileek egingo dute Meatzaldeko azken kilometroa (2112), euren egoitza aurretik pasatuz, sirena hots eta argien babesean. Ezkerraldera sartzean Portugaleteko koadrilek emango diote ongietorria Korrikari goizeko bostak aldera. Pare bat kilometro eginda, Santurtzin sartuko da, Korrika antolatzen lagundu duten talde eta elkarte askoren babesean. Aipatzekoa da karrera pasatu aurretik egingo den folk kontzertua hogei elkartek osatutako Santurtziko Txosna Batzordeak antolatu duela. Herriko Udalak ere hartu du kilometro bat, eta Kantauri eta Axular institutuetako ikasleek 2123.a partekatuko dute. Axular institutuak 25 urte bete ditu aurten, eta bera izan zen Ezkerraldean D eredua eskaintzen lehena. Berriro Portugaletera itzuli eta Sestao eta Barakaldotik pasatu ostean Erandiora joko du Korrikak, baina ez lasterka, txalupan baizik. Han kilometro batzuk egin ostean Txorierri eskualdera joko du zapatu goizean argia hastean. Batzuk arineketan eta beste batzuk e-KORRIKA Bestalde, milaka eta milaka herritar euskaltzalek hankak euskararen aldeko dantzan dituzten bitartean, Mondragon zentro korporatiboan diharduten langileak kooperatibako Euskara Batzordeak proposatutako ekimenari heldu eta jo eta ke ari dira e-KORRIKAn: martxoaren 26an eta arratsaldeko 15:30ean abiatu zen e-mailez osatuz joango den mezu katea. http://www.lantalan.com/148 Thu, 02 Apr 2009 23:56:20 +0200 http://korrika.org/index.php?name=News&file=article&sid=232 Yanellen bertsoa Araia Altsasu Bakaiku Lakuntza. Goizeko ordu txikietan ere ongi etorri. Aguraingo taberna batean utzi genuen atzoko kronika. Postura zegoen, zeinek egingo zituen minutu gehien korrika. Ehun lagunek euro bana apostatu dute. Garaileak 2 ordu eta 35 minutu behar izan ditu, Agurandik Ziordiraino. Bildutakoaren erdia poltsikoratu du. Beste erdia, berriz, Korrikako merienda ordaintzeko gorde dute. Ataun. Itxarotearen ideia hutsari erreparatzen badiogu, purgatorio atsegina da bide bazterra. Jendea zain egoten da Korrika noiz ailegatuko. Lasterketa atzeratuta badator, itxaronaldia luzea izan daiteke. Baina bide bazterra seinale onaren adierazgarria da. Ataunen, ordea, bestelako itxarotea (bestelako purgatorioa!) ezagutu dute. Baziren 20 urte Korrika ez zela handik pasatzen. Sinadura bilketa egin ostean, xamurtu egin dituzte antolatzaileak. Lizarrustira korrikalari ugari bildu dira. Poliki-poliki abiatu gara San Gregorio auzora. Giro ezin ederragoa daukagu. Baita San Martinen ere. Bide bazterra purgatorioa bada, zerua izan behar du Korrikak. Infernua dela pentsatzen duenik ere bada, noski. Eta Korrika kolore anitzetako zerua da. Eskoletako haurrek marrazten dituzten petoek ezin hobeto adierazten dute aniztasun hori. Umeak Korrikaren parte oso garrantzitsua baitira. Beasain Ordizia Legorreta Alegia. Milaka ume. Lau eta bost urtekoak ere ugari. Agian batzuk txikiagoak. Tolosa Villabona Andoain. Eta Lasartera heldu gara hirurak laurden gutxitan. Prentsa taldeko lagunok 1668 kilometrora aurreratu gara. Mirentxuenean Pirritx, Porrotx eta Mari Mototsek hartu behar dute erreleboa. Bidearen alde bietan hamaika haur daude. Korrika aldapan behera egiten duenean, euskaraz arraio tximista edo patata tortilla entzungo dugu; katxiporreta edo ongi, ongi, Marimondongi, menturaz. Porrotxek jakinarazi digu ez dutela eurek eroango lekukoa. Yanelle izeneko neskato batek egingo du. Yanelle Beningoa (Afrika) da eta orain dela bost hilabete etorri zen ebakuntza bat egitera. Denbora honetan ederki ikasi du euskaraz hitz egiten. Eredua da guretzat eta euskaraz ez dakitenentzat. Yanellek eraman behar du lekukoa, ez guk. Kilometro alaia eta hunkigarria izan da. Kostaldera egin dugu arratsaldean. Orio Zarautz Getaria. Itsas handia dago, Korrika badator. Iluntzean, Zestoako alkate guapoari muxua eman ondoren, Azpeitiara sartu gara. Jose Lizaso bertsolaria hil berri da eta Korrikak omendu egingo du. Lasterka noa Xan Alkkhat Euskal Irratiaren kazetariarekin. Xan bertsolaria da. Gai-jartzaileak gaia finitu gabe hasten zen bertsotan Lizaso. Aitak kontatu dit behin baino gehiagotan. Xanen aita Ernest Alkhat bertsolaria da. Bertsolari handia izan da Lizaso. Aitaren erranetan, bertso kaxkar bat ere eder bihurtzen zuen bozarekin. Beñat Lizaso bilobak hartu du lekukoa herriko kaleetan barrena. Korrika mantsotu egin da. Furgonetan Jokin Uranga bertsotan hasi da: Karriketan korrika Bi urtetik bi urtera Euskaltzaleak pozik Elkartu ohi gera Gaur pena bat daukagu Arrazoiz gainera Joxe Lizaso nun da Da gure galdera Ziur nago gurekin Datorrela bera. Aurrera jarraitu dugu, Azkoitiara bidean. Gure artean sumatu dugu bertsolaria. Une batez begitandu zait Yanelle ere gurekin datorrela. Noraino eta Gasteizeraino. Haren irria behinik behin han izango da. Berandu da. Luze gabe Ondarroara ailegatuko gara. Bihar goizean ere egunon Bizkaia esango diet Bizkaia Irratiko lagunei irrati-konexioan. LUTXO EGIA (Santander, 1969) Soziologian lizentziatua eta kazetaritzan aritua, e­gun literaturan dihardu. Hainbat ipuin eta poema ditu idatziak, baina gehienbat nobelan saiatu da. Horrela, Kalezuloko animalien izenak (Pamiela, 1999) haur literaturako poema liburuaz gain, Paperezko hegazkinak (Susa, 2002), Ezker hanka falta zuen (Susa, 2005) eta Zubigilea (Susa, 2007) nobelak argitaratu ditu. Nontzeberri.com kultura atariaren sortzailea ere bada. ­ Thu, 02 Apr 2009 23:52:30 +0200 http://korrika.org/index.php?name=News&file=article&sid=231 Euskal Herria esnatzen hasten denean Gipuzkoan ibiliko da Korrika 16, goizaldetik Goiherrin sartuta. Gosari orduan bertako herriak zeharkatu ondoren, Tolosaldean barrena murgilduko da goiza han pasatzeko. Inguru horretako hainbat eta hainbat udalek egingo dute kilometroa, eta beste hainbat elkarte, ikastetxe, langile, kirolari eta herritarrek ere bai. Batzuk aipatzearren, Tolosaldeko eta Leitzaldeko Hitzak 1627. kilometroa egingo du; aurten hamar urte betetzen dituen Anoetako Gazte Asanbladak 1635.ena; eta 1644. kilometroan Adunako eskolak erositako lekukoa Natxo eta Juankarlos biki argentinarrek eramango dute, Hego Amerikatik etorri eta erabat euskaldundu den familia bateko semeak. Urnietarantz egingo du ondoren Korrikak, han lau kilometro egiteko, bertako Udalak eta hiru ikastetxek erositakoak. Beraz, umeak ere asko izango dira bertan. Lasartearrek jai giroan hartuko dituzte, herriko lehen kilometroa (1658) Sorgin jaiak batzordeak egingo baitu. Lasarten egingo dute kilometroa Pirritx eta Porrotx pailazoek ere (1668). Eta Usurbilen, besteak beste, 1675 kilometroa konpartituko dute Noaua! aldizkariak eta Andeza mendi taldeak; Usurbilgo azken kilometroa, berriz, Aginagako jai batzordeak egingo du. Bestalde, inguru honetako kirol, kultur eta gastronomia talde askok hartuko dute euskararen lekukoa. Gipuzkoako kostaldera aterako da ondoren Korrika 16, hurrengo kilometroak itsasertzean egiteko. Orio, Zarautz, Getaria eta Zumaiako Udalek hartuko dute parte, baina horiez gain, eskualdeko alderdi politiko, elkarte, herri aldizkari eta abarrek eramango dute lekukoa. Orion, esate baterako, arraunlariak jarriko dituzte korrika Orio mendateko aldapak igotzeko 1692. kilometroan; Zarautzen euskara ikasten hasi berri den jubilatu batek hartuko du lekukoa iloba berarekin duela; eta Zumaiko AEK-k euskaltegi parean egingo du bere kilometroa, lekukoa EGA ikastaroa egiten ari den kanariar baten esku utzita. Gipuzkoan barrena egingo du berriro Korrikak iluntze aldera, Urola bailaran sartzeko. Azpeitian momentu hunkigarriak biziko dira, hilberri den herriko Joxe Lizaso bertsolaria gogoan izango baitute korrikalariek, batez ere Erniarraitz bertso eskolaren kilometroan (1748). Handik Azkoitia eta Azkarate mendate aldera egingo du karrerak hamar eta erdiak aldera Elgoibarrera heltzeko. Eta handik buelta Mendarora, eta kostaldera berriro. Debatik pasatu ostean Mutrikun sartuko da Korrika. Herriari dagozkion bederatzi kilometroak asko zatitu behar izan dituzte parte hartu nahi zuten guztiei lekua bilatzeko: futboleko eta eskubaloiko neskak, arraunlariak, mendizaleak, sokatirakoak, jubilatuak, institutuko ikasleak eta langileak, dantza taldekoak, zine forumekoak, rock kolektibokoak.... besteak beste. Baita lekukoa mozorrotuta hartuko duten Goizeko izarra antzerki taldekoak ere. Bizkairantz egingo du Korrikak ondoren, eta Ondarroatik sartuko da, Lea-Artibai eskualdean zehar ibiltzeko bariku goizaldean. Edizio honetan Korrika ilunpean egitea tokatu zaienez, lekuko eramaile guztiek zuzien argipean itxarongo diote karrerari, baita Isuntza arraun taldeko kideek ere Lekeitioko sarreran, ohi duten legez. Busturialdean sartuko da Korrika 16 goiz albarekin batera. Wed, 01 Apr 2009 22:48:54 +0200 http://korrika.org/index.php?name=News&file=article&sid=230 Daviden azterketa Eltziego Trebiñu Argantzun Tortura Izarra. Ongi etorri. Korrikak badu sistole-diastoleko mugimendu bat. Edo, beste era batera, diastole-sistolekoa. Lekuko aldaketetan lasterkariak xurgatzen ditu aspiradora bat balitz bezala; ondoren, poliki-poliki, kanporatu egiten ditu modu goxo batean. Erakarri eta sakabanatu. Hartu eta egotzi. Korrikaren indar zentripetuak barrura eroaten ditu zurrunbilo baten lez; bulkada zentrifugoak, aldiz, botatzen ditu. Eta lasterketa honek euskara punpatzen du Euskal Herriko zoko-moko guztietara. Bihotz baten gisa. Gaur ere hitz bat aukeratu beharko banu, horixe aukeratuko nuke: bihotza. Korrikan aise sumatzen da: mendateak arnasestuka igotzean; gauez Arabako eta Nafarroako lautadetan barna kasik bakarrik (ez, ordea, bakardadean) korri egitean; tokian tokiko festak eta harrerak antolatzean; edo azterketa batera berandu heltzean. Urduña Amurrio Laudio. Ongi etorri. Hamaikak eta erdietan heldu gara Laudiora. Ehunka euskaltzaleren artetik, mutil batek antxintxiketan lortu du hurreratzea aurreko furgonetara. David du izena. Ile laburra du, begitarte irribarretsua eta begi ameslariak. Kamixeta gorri bat daroa soinean. Estilo ederrean dabil, antilope bat iduri. 1389. kilometroan gabiltza. Mutila tropelean galdu zaigu berehala. Orozkotik pasatzean atzera ere erreparatu diogu. Hori dok hori sasoia! oihu egin dugu. Baionan bezala, Orozkon ere bildu zaizkigu gazte bretoiak. Baranbiorantz egin dugu. Altubera goaz. Mendate gogorra daukate gure hankek zain. 1406. kilometroan, tropel txikian, eta hatsanka bada ere, mutilak gurekin darrai. Gasteiza arte segitu behar duk?, galdetu diogu. Ez, ordu biak eta erdietan azterketa daukat! Ordu bata eta hogeita bi minutu adierazten du Korrikaren erlojuak. Examinaz itaundu diogu. Literatura. Barre gaizto bat egin du. Eta uste duk iritsiko haizela garaiz? David hurrengo kilometroan alde egin du. Sasoiz ailegatuz gero, esaiok irakasleari Korrika poesia dela, garrasi egin dio inork. 1409. kilometroa. Prentsa taldeak hartu du lekukoa. Badatoz Korrika eta komeriak. Furgonetatik animozko oihu beroak ailegatzen zaizkigu: Kazetariak, furgonetan ez! Edo beste honako hau: Non zabiltzate gauetan!?. Baina aupadak bakarrik balira, gaitzerdi. Noiz hanka bakarrean noiz ondokoari belarri-tiraka korri egin behar dugu. Ez dakite vendetta-rako parada topatuko dugula geroago. Agian Etxarrin. Edo Ordizian. Edo Zumaian. Murgia Zarate Gopegi Legutio Dallo Dulantzi. Ongi etorri. Agurainera iristear gaude. Herriko taberna batean postura dago, apustua: zeinek egiten dituen arineketan minuturik gehien. Erantzuna Joseba Aguraingo AEKko arduradunak emango digu bihar. Gautu du Korrikan. Goizaldean Ziordiatik sartuko gara Sakanara, hots, atzera ere Nafarroara. Ailegatuko ote dira Aguraingo korrikalariak haraino? Gaur ere bihotzak punpatuko du.­ LUTXO EGIA (Santander, 1969) Soziologian lizentziatua eta kazetaritzan aritua, e­gun literaturan dihardu. Hainbat ipuin eta poema ditu idatziak, baina gehienbat nobelan saiatu da. Horrela, Kalezuloko animalien izenak (Pamiela, 1999) haur literaturako poema liburuaz gain, Paperezko hegazkinak (Susa, 2002), Ezker hanka falta zuen (Susa, 2005) eta Zubigilea (Susa, 2007) nobelak argitaratu ditu. Nontzeberri.com kultura atariaren sortzailea ere bada. ­ Wed, 01 Apr 2009 22:44:36 +0200 http://korrika.org/index.php?name=News&file=article&sid=229 Izarran argituko dio eguna asteazkenean Korrikari, eta handik egingo du Urduña aldera. Eguerdia bitartean Amurrio, Aiara eta Laudio zeharkatuko ditu, eta herri guztietan aterako dira ikastetxe guztietako ikasleak lasterkara. Horiez gain, inguruko udalek, alderdi politikoek, sindikatuek eta langileek ere hartuko dute lekukoa, besteak beste, Tubos Reunidos eta Tubacex enpresetakoek. Ondoren, lehendabiziko aldiz bisitatuko  du Korrika 16k Bizkaia, Orozkon hamaika kilometroko sartu-irten labur bat egiteko, baina berehala itzuliko da Arabara, Baranbioko ehiztarien ongietorria jaso eta Altuberantz igotzeko. Hirurak aldera harrapatuko du gaina. Arratsalde partean Zuia eta Zigoitiako biztanle, elkarte, erakunde eta alderdi politikoek hartuko dute parte, eta berdin gertatuko da Legutio aldean ere. Iluntzea eta gaua Lautadan igaroko dituzte korrikalariek, eskualdeko kirol eta kultur elkarte gehienekin batera. Ozetan ikusiko du Korrikak edizio honetako une hunkigarrienetako bat, Itziar Lauzirikak hartuko baitu lekukoa, duela bi urte Korrika 15 herritik pasatu baino pare bat egun lehenago hil zen Yago mutikoaren amak. Yago Korrika zale amorratuak ezin izan zuen 15.ean parte hartu, baina orain  haren amak eramango du lekukoa semearen izenean. Dulantzi, Donemiliaga, Iruraiz Gauna, Agurain, Zalduondo eta Asparrengo udalek erosi dute kilometroa Lautadan. Eta, besteak beste, Mendiak lau haizeetara plataformak Gereñun; abeltzain eta nekazariek, Agurainen; eta Nestle-Mikoko langile komiteak Zalduondoko irteeran. Adi ibili beharko dute karrerako arduradunek Zalduondo pasatzean gauerditik hurbil, aurreko edizioan inauterietako Markitos pertsonaia lekukoa harrapatzen saiatu baitzen. Gainera, herri horretako biztanleak pijama jantzita ere atera izan dira Korrikara, karrera euren herritik beti gauez pasatzen dela salatzeko. Ostegun goizaldean sartuko da Korrika 16 berriro Nafarroan, Sakanatik (1518 km), herrialde hartako azken kilometroak egiteko, berrogeita lau hain zuzen ere. Ziordia, Olazti, Altsasu, Urdiain, Iturmendi, Bakaiku, Etxarri, Arbizu eta Lakuntzako udal, elkarte, ikastetxe, alderdi politiko, langile eta bestelakoek gauez egingo diote harrera beroa Korrikari edizio honetan, goizaldeko ordu bata eta lau eta erdiak bitartean. Nafarroa Oinez-ek, esate baterako, 1560 kilometroa egingo du Gipuzkoako mugatik hurbil. Mendiz pasatuko du Korrika 16k Nafarroa eta Gipuzkoa arteko muga, Lizarrusti gainetik. Ataun izango da, beraz, Gipuzkoan sartzen den bigarren aldian ikusiko duen lehen herria. Ataundarrek beren-beregi eskatu dute Korrika 16 herritik pasatzea, Udalak AEKri zuzendutako gutun baten bitartez, eta goizeko bost eta erdiak aldera izango dute lekukoari harrera egiteko aukera. Handik Lazkao, Olaberria, Idiazabal, Segura, Zerain, Mutiloa, Ormaiztegi eta Beasain aldera, baina hori ostegun goizean izango da. Tue, 31 Mar 2009 22:45:08 +0200 http://korrika.org/index.php?name=News&file=article&sid=228 Lizarrako sei hizkuntzak Nafarroatik Arabara egin du Korrikak gaur. Prentsa taldekook ederto eman dugu gaua Tafallako ostatu batean. Sei ordu eta erdi egin dugu lo. Ez dago gaizki, aurreko gauei erreparatzen badiegu behinik behin. Tafallara heldu aurretik, Artaxonako gaina zeharkatu dugu. Maldan gora genbiltzala gizon bat hurreratu zait. Begi borobil handiak ditu, sudur zapala eta ondo zaindua bizarra. «Hemen oiloek kuleroak eramaten dituzte soinean». Aldapa izugarriari begiratzeko keinua egin dit. Arnasestuka gabiltza goiz-goizetik. Ez ote zaidan kruasana zorabiatuko, nik neure artean. Gizonak azalpena borobildu du: «Bestela arrautzak jausten zaizkie». Izerdi-patsetan ailegatu gara Tafallara. Ostatura bueltatu ez bueltatu, duda egin dut une batez. Une txipia. Ezdeusa. Herriko plaza eta kale meharrak lepo daude. Ikastolako umeak arrapaladan sartu dira, «Tafallan ere euskararen alde!» oihukatzen dutela. Herritar mordoa karrikaratu dira adierazteko maite dutela Korrika. Herritik irtetean, Txalaparta argitaletxeko langileek literaturizatu dute lekukoa. Txandaka eroan dute. Mikel Soto editoreak eta biok elkarrekin ibili gara arineketan idazleen aferarik aipatu gabe. Berbintzana Larraga Oteiza. Lautada zabaletara itzuli gara. Haizeak albotik jotzen du, ziklismoan bezala. Oteizako Udalak bolumen brutalean oparitu digu Korrika 16.aren kanta, larunbatean AC/DC taldeak Barakaldon eman behar duen kontzertuari konpetentzia ederra. Lizarra bistaratu dugu eguerdian. Lasterketa modu literario batean hasi denez, Laura Mintegi idazlearekin gomutatu naiz. Herri honi buruz dakidan gehiena hari entzundakoa da. Ongi etorri ikaragarria da. Ehunka euskaltzale batu zaizkigu oihuka eta saltoka. Suge koloretsu luzea dabil karrika estuetan. Taldeko kazetari batzuek diote agian orain arteko jendetsuena dela. Bat baino gehiago hunkiturik gaude. Atzoko adierazpenek nahastu gaituzte nonbait, begi aurrean benda bat ipini. Lizarrak ikaragarri maite du Korrika. Larrion Artabia Barindano. Opel Vectrari galga jarri eta Laurari hots egin diot telefonoz. «Zer dauka herri honek?». Ezustean harrapatu nau erantzunak: «Lizarran sei hizkuntza ezberdin mintzatu izan dira Erdi Aroko hiru mendetan zehar, eta guztiak batera mintzatzen ziren, ez biztanle guztien ahotan, eta ez auzo guztietan ere, baina bai Lizarran bertan XI eta XIV. mendeen artean». Tuterako emakumearekin akordatu naiz. Hark ere esan zidan herriko lur-zorua eleaniztuna zela. Berba egiten utzi diot:  Lizarrako kaleetan lasai asko entzun zitezkeen arabiera, hebraiera, euskara goi nafarrera, erromantze nafarra, erromantze gaskoina eta erromantze ozitanoa. Sei hizkuntza, eta ez beti  konbibentzia onean. Zalantzatik kanpo dagoena da lizarratar bat ere ez zela elebakarduna, eta eleanizduna izatea gauza arrunta zela bertan». Lipar batez iruditu zait Laura dabilela Korrikan eta neu irrati batetik deika. «Ez harritu horrenbeste. Herri betidaniko euskalduna izanik, zenbait urtez galdu zuen bere hizkuntza-identitatea beste hizkuntzen mesedetan, eta orain berriro identitatea eskuratu nahian dabil. Identitate euskalduna, alegia». Zudaire San Martin Aranaratxe. Larraona azkenik. Araban gara dagoeneko. Etzi, goizaldean, ostera ere sartuko gara Nafarroara, Ziordiatik. Irrikan gaude bueltatzeko. Ilundu du. Bederatziak jo berri dute. Lasterketak ekuatorea erakutsi digu Meano herrian. 1252 kilometro bete ditugu daborduko. Korrikaren erdia. Xanpainez ospatzen ari gara. Gora Korrika!­ LUTXO EGIA (Santander, 1969) Soziologian lizentziatua eta kazetaritzan aritua, e­gun literaturan dihardu. Hainbat ipuin eta poema ditu idatziak, baina gehienbat nobelan saiatu da. Horrela, Kalezuloko animalien izenak (Pamiela, 1999) haur literaturako poema liburuaz gain, Paperezko hegazkinak (Susa, 2002), Ezker hanka falta zuen (Susa, 2005) eta Zubigilea (Susa, 2007) nobelak argitaratu ditu. Nontzeberri.com kultura atariaren sortzailea ere bada. ­ Tue, 31 Mar 2009 22:40:23 +0200 http://korrika.org/index.php?name=News&file=article&sid=227 Astearte iluntzean beteko du Korrika 16k bere ibilbidearen erdia, Gasteiztik gero eta hurbilago. Baina karreran laguntzen doazen kideek xanpain botilak irekitzen hasi baino lehen, edukiko dute bestelako lanik. Tafallara iritsiko dira gosari orduan gutxi gorabehera eta giro animatua aurkituko dute, lekukoa eramango duten lagun, elkarte eta erakundeen zerrenda luzeari erreparatuz gero behintzat. Besteak beste, Tafallako ikastolak, Udaleko euskara batzordeak, hainbat tabernak, Txalaparta argitaletxeak, dantzari eta txistulari taldeak, Trinketa mendi elkarteak eta Ahaztuak elkarteak hartuko dute lekukoa. Tafalla utzi eta Lizarra aldera sartuko da Korrika 1157. kilometroan, goizeko 11ak aldera. Hainbat eta hainbat udalek hartuko dute kilometroa eskualde horretan, hala nola, Gesalatz, Jaitz, Allotz, Oteiza, Bilatorta eta Allingoak. Kirolaririk ere ez da faltako, Lizarrako mendizale elkartea, San Migel pilota elkartea eta Itxako kirol elkartekoak ere bertan izango baitira lekukoa eramateko prest. Bestalde, inguruko enpresa askotako langileek erosi dute kilometroa, baita Iruñeko Koxka enpresako behargin kaltetuek ere, Larraonan. Nafarroako hiriburuko suhiltzaileek, berriz, Larragan egingo dute beren kilometroa. Lizarra inguru osoko herritarrak irtengo dira kalera Korrikarako bidean, Ameskoakoak bezala. Hauek, adibidez, herritar guztien artean egindako diru bilketari esker, Korrika 16ren bederatzi kilometro erosteko adina atera dute, eta pozik egingo dituzte, nahiz eta jarraian izan ez, tarteko kilometro batzuk erosten beste batzuek hartu dietelako aurrea. Arabarako mugara iritsiko dira korrikalariak arratsalde erdian, eta Kontrastatik sartuko da Korrika herrialdean, Mendialdetik. Behin Kanpezu igarota, sartu-irten bat egingo du Nafarroako Lapoblacionera bisita egiteko, eta berriro Arabara, gauean eta goizaldean Errioxan ibiltzeko: Guardian, Lapuebla de Labarcan, Eltziegon... gazteak eta ikasleak, besteak beste, korrikarako prest. Eta berriro aldapa gora, Herrera mendatea gainditzera. Burgostik oso gertu ibiliko da Korrika asteazkeneko lehen orduetan, Trebiño inguruan. Euskaldun eta euskaltzale asko bildu ohi da konderrian Korrikaren eta euskararen alde, eta edizio honetan ere ez dira gutxiago izango. Bertan hartuko dute lekukoa Udalak, Gutxisolo euskara elkarteak eta beste hainbat herritarrek, ondoren txokolate beroa hartuta berotzeko. Tuyotik sartuko da Korrika Añanan, eta bertara hurbilduko dira Miranda de Ebroko lagunak ere, 16. edizio honetako hiru kilometro egitera. Izarra aldean gehituko zaio egun argia karrerari, Urkabustaiz aldean ikusiko baitu egunsentia, baina hori asteazkeneko kontua izango da. Mon, 30 Mar 2009 22:47:58 +0200 http://korrika.org/index.php?name=News&file=article&sid=226 Korrikaren mintzoa Iluntzen hasi du. Orain ordubete utzi dugu atzean Elizondo. Anizera iristear gaude. Eta Korrikak aurrera darrai. Aurten, oso oker ez nabil, berrogeita hamar urte beteko dira Allan Sillitoe idazle ingelesak The Loneliness of the Long Distance Runner (Korrikalariaren bakardadea esango nuke borobiltze aldera) argitaratu zuenetik. Iraupen luzeko lasterketen bidez birgizarteratzea lortu behar duen preso gaztea dugu narratzailea. Gorroto duen ororen alde korri egitera behartzen dute. Baina jai daukate, jai daukatenez, berarekin. Arineketan korrikalariaren bakardadea deskubritzen du: bakarrik gaude mundu honetan. Aurreko mendeko pentsalari ugariren oparia dugu. Bada, ordea, axolgabekeriatik haragoko gune bat. Eta Korrikak gune horretan paratzen gaitu. Lasterketaren mintzoa, ez gaude bakarrik. Korrikaren hiztegia sano aberatsa da, oparoa. Kilometroz kilometro osatzen da. Tokian tokiko moduak agertzen ditu baina, azken batean, bat eta bakarra da Auzan, Zestoan, Isturitze, Gorlizen eta Donazaharren. Toki guztietan. Euskara non, Korrikaren hiztegia han. Esate baterako: aldapa, lekukoa, tipi (tapa!)… Gainera, hitzak ez dira elkarren arrotzak. Hiztegiaren E letran elkartasunarekin topatuko dugu. E letra mardula da, guria, O bestekoa behinik behin. Ekintza txipien bidez gizentzen da pausoz pauso. Senpere inguruan urgentziazko lana sortu zaien suhiltzaileei berehala hartu diete erreleboa; bart Urdiñarben Maritxu bidera irten da kafea eskaintzen furgonetako kideei; Beran, gaur, gurasoek lepoan eraman dituzte seme-alabak kaleetan zehar. Eta Elizondon umeek ikaragarri eman digute: nekea gora zihoan ordu horretan, marrazkiak eskegi dituzte burdin hesi batean. Gasteiza gerturatu ahala ohartua naiz zer garrantzitsua den E elegante hori Korrika egunero gabiltzanon artean. Barruan hobeto konprenitzen dugu zer den lasterketa hau. Edo, gutxienez, beste ikuspegi bat ematen digu. Prentsa-taldean hedabideetako langileak (Gara, Berria, Info7 eta Euskal Irratia) eta Korrikako lagunok gabiltza. Lan handia dago egunero: ehunka argazki kudeatu, konexioak egin hamaika irratirekin, telebistei tokia egin, irudiak grabatu, ordu luzeak gidatzen eman, idatzi… Eta hori guztia ezingo litzateke egin taldea ondo koordinaturik ez balego. Horretan Ana, Ane eta Eñaut artista hutsak dira. Baina koordinazioa ez da nahikoa. Uneoro zabalik eduki behar dugu hiztegia E letraren orrian. Anizera heldu gara. Une honetan 1.000 kilometroa betetzen ari gara. Alkateak hartu du lekukoa. Andrazko bat batu zaio. Eskutik helduta ari dira tipi-tapa. Emakumea furgonetara hurbildu da eta poltsa bat utzi digu. Poltsan gazta bat eta pastak daude. Nafarroak Korrika maite du.­ LUTXO EGIA (Santander, 1969) Soziologian lizentziatua eta kazetaritzan aritua, e­gun literaturan dihardu. Hainbat ipuin eta poema ditu idatziak, baina gehienbat nobelan saiatu da. Horrela, Kalezuloko animalien izenak (Pamiela, 1999) haur literaturako poema liburuaz gain, Paperezko hegazkinak (Susa, 2002), Ezker hanka falta zuen (Susa, 2005) eta Zubigilea (Susa, 2007) nobelak argitaratu ditu. Nontzeberri.com kultura atariaren sortzailea ere bada. Mon, 30 Mar 2009 22:41:55 +0200 http://korrika.org/index.php?name=News&file=article&sid=223 Eguerdi partean bukatuko du Korrika 16k Lapurdin, Nafarroa Beherean eta Zuberoan zehar egin beharreko 265 kilometroko ibilbidea. Korrika ordu bata laurden gutxi aldera Beran sartuko da, 16. edizio honetako 944. kilometroan, eta Nafarroan egin behar dituen hiru itzulietatik bigarrena hasiko du. Astearte arratsaldera arte Bortziriak, Ultzama, Baztan, Iruñerria eta Tafalla ingurutik ibiliko da, eta tartean, ostegun goizaldekoaren aurrerapen gisa, Sakanan ere sartu-irtena egingo du (Irurtzunen gau erdian sartuko da Korrika). Ohi denez, ez da faltako langilerik, kirolaririk, bertsolaririk, trikitilaririk, gazterik, umerik edota gurasorik, lekuko eramaileen eta korrikalarien artean. Esaterako, Bortzirietan Ricardo Baroja ikastetxeak eta Labiaga ikastolak (949 km), Toki Ona institutuak (950), Irain ikastetxeak (955), Tantirumairu ikastolak eta dantza taldeak (956), Igantziko eskolak eta guraso elkarteak (959), Arantzako eskolak (960), Arraiozko Guraso elkarteak (984), Iruritako Guraso elkarteak (986), Baztan ikastolak (991), Baztango institutuko gurasoak (996), Baztango herrietako eskolak (998)... hartuko dute lekukoa; Irurtzunen Irurtzungo eskolak (1052); eta Iruñerrian, Atondotik Campanaserako bidean, Sortzen Ikasbatuaz-ek (1057), Garesko eskolak (1105) eta APIMA gurasoen elkarteak (1107), besteak beste. Hainbat udalek ere kilometroa erosi eta lasterketan parte hartuko dute, hala nola, Lesakako Udalak, Igantzikoak (959), Arantzakoak (960), Elizondokoak (989), Baztangoak (998), Etxaurikoak (1066), Irurtzungoak (1051), Arakilgoak (1053), Gatzolazkoak (1070), Zizurrekoak (1071), Utergakoak (1103), Garesekoak (1107), Mañerukoak (1111), Mendigorriakoak (1113), Ziraukikoak (1115)… Eta nola ez, udalez gain, bertako herritarrek Elizondon, Zigan, Amaiurren, Anizen, Berroetan, Añarben, Biurrunen, Mañerun, Artazun, Ziraukin, edota Mendigorrian, hartu eta egingo dituzten kilometroak. Baita Baztandarren Biltzarrak ere (1010). Langileen oihu eta aldarriak berriro entzungo dira: 953. kilometroan, Lesakan, ALCOko eta ARCELOReko langileek hartuko dute parte, eta 1108. kilometroan, Garesen, EUNEAko langileak. Kilometro zalapartatsu eta alaienak gazteen eskutik etorriko dira seguruenik, Arizkungo eta Erratzuko gazteen, eta Obanosko Gazte asanbladen eta Elizondoko, Arantzako eta Berako Gaztetxearen eskutik, alegia. Zizurren, bestalde, bertako trikitilariek eta zanpantzarrek 1070etik 1080ra doazen kilometroak egingo dituzte. Sun, 29 Mar 2009 22:44:50 +0200 http://korrika.org/index.php?name=News&file=article&sid=222 ­Non düzü kutxa? Hala galdetu digute Ana Korrikako kideari eta bioi lasterketa Donibane Lohitzunen barna zihoala. «Non düzüe kutxa?». Korrikako Opel Vectran goaz, hamaika euskaltzaleren atzetik. Aurreko furgoneta ez dugu ikusten, AEKko dozenaka bandera horik eragozten digute. Gibeleko autoa ahaleginetan dabil gure parean jartzeko. Ez da erraza. Bidea estua da hiri barnean eta, alboetan, tropela galtzen ari den korrikalariak doaz. Ez diogu lehenengoan ulertu galdera egin digun gizon txapeldunari. Zaharra da. Iharra. Begi biziak ditu. «Non düzüe kutxa?»  atzera ere itaundu digu billete bat astinduz. Oraintxe konprenitu dugu. Korrikazaleak bere ekarpena egin nahi du. Atzera aurrera dabil, gure parean nola jarriko. Gaur hasi da 1 Formula, non eta Iparraldean. Azkenean lortu du eta hogei euroko billete bat eman digu. «Biba Korrika!». Biba. Ongi etorri, Iparralde! Santiago zubitik sartu da Hendaiara gaur Korrika. Errelebo polita izan da. Irungo AEKko lagunek eta Hendaiako AEKko kideek eroan dute lekukoa. Egun ederra dator. Eguzkiak gaur ere lagunduko digu. Korrika mendebaldetik ekialdera, Behe Nafarroara eta Zuberoara, abiatuko da goizean. Gau partean Lapurdira bueltatuko da. Urruña Ziburu Donibane Lohizune. Lehen harrera jendetsua da. Getari Bidarte Arbona Miarritze. Biarritz Olynpiqueren buruzagi indiarrak daroa lekukoa. Korrika eta saltoka zale ugari batu zaizkio. Angelu. Korrikaren kilometrorik politikoena dugu, duda barik. Bihurgune batean zain dauzkagu Iparraldeko alderdi politiko nagusi guztietako (guztiak!!!!) ordezkariak. AB dago. Batasuna dago. EA. Berdeak. Modem. NPA. PC. PNB. PS. UMP. Aldapa pikoan gora ekin diote igotzeari. Politikariak beti gora, ezinbestez. Korrikalariak oihuka (aldarrika) hasi dira: «Politikan ere euskararen alde!». Baiona. «Adi dadi, adi dadi, Ar Redadeg!». Ez dugu deus ulertu. Bretainiako bandera bistaratu dugu furgonetatik. Bordeleko Gau Eskolako lagunak eta Bretainiako delegazioa hartu dute lekukoa. «Tipi-tapa, tipi, tapa, Korrika!». Adi dadi. Eta adi ibili beharko dute gaurkoan, hemen badago zer ikasia. Bretoiek datorren urteko maiatzean antolatuko dute euren bigarren lasterketa handia. Eta, tipi-tapa, tipi-tapa, Korrikalariak pauso seguruan doaz Baiona Txipirantz. Ehunka euskaltzalek eman digute ongi etorria. Besoak zabal-zabal eginda hartu dute Korrika karrika mehar hauetan. Atzo Iruñean bezala, festa handia dago. Eta emeki mendebalderantz goaz. Mugerre. Beskoitze. Enrique Vila-Matas idazle katalanaren ustez, harriduraz begiratzen dugu ingurukoa beste batzuekin bidaiatzean; gure kasa bagabiltza, berriz, geu izaten omen gara beti arrotzak. Eta arratsalde honetan, Behe Nafarroara eta Zuberoara egin ahala, zur eta lur behatzen dugu, arroztasun oro bazterturik. Goxoa da ekialdera bidaiatzea. Hazparne Garruze Donapaleu. Herri honetan sartu berri da Korrika. Gauez mendebaldera joko dugu. Itzulerak ere goxoak dira. Ainhizen ongi dakite hori. Horregatik hor hartuko du Euskal Herriko Laborantza Ganbarak lekukoa. Nekea pilatzen doa. Gauez jotzen du erasoa, banpiro baten lez. Donibane Garazi Baigorri Ortzaize Luhoso Itsasu. Asfaltoak amets xelebreak sortzen ditu. Bart Korrika Zaragozara zihoan espantada handian. Ihesa gelditu ezinik nenbilen, berunezko zangoek zapaltzen zuten bero-sapak urtutako asfaltoa. «Bidea hatsanka dabil, bidea hatsanka dabil!!». Eta ustekabean esnatu egiten gara. Korrika ez baita ametsa. Eta, hala ere, hamaika biltzen ditu. LUTXO EGIA (Santander, 1969) Soziologian lizentziatua eta kazetaritzan aritua, e­gun literaturan dihardu. Hainbat ipuin eta poema ditu idatziak, baina gehienbat nobelan saiatu da. Horrela, Kalezuloko animalien izenak (Pamiela, 1999) haur literaturako poema liburuaz gain, Paperezko hegazkinak (Susa, 2002), Ezker hanka falta zuen (Susa, 2005) eta Zubigilea (Susa, 2007) nobelak argitaratu ditu. Nontzeberri.com kultura atariaren sortzailea ere bada. ­ Sun, 29 Mar 2009 22:38:42 +0200 http://korrika.org/index.php?name=News&file=article&sid=221 Igande goizean goiz sartuko da Korrika 16 Iparraldera, Hendaiatik. Irun eta Hendaiako AEK-ko ikasleek eramango dute lekukoa momentu horretan, ondoren Pirritx eta Porrotx pailazoen esku uzteko. Hendaiako Udalak berak ere emango dio ongietorria Korrikari kilometroa erosi eta fatxadan Korrikaren pankarta handi bat jarrita. Donibane Lohitzunen, berriz, Iparraldeko euskalgintzako mugimenduek eta Euskal Konfederazioak egingo dute 691. kilometroa, ondoren lekukoa Iparraldeko kazetariei pasatzeko. Goiz erdian Miarritzera iritsiko dira korrikalariak eta han izango dituzte zain Iparraldeko lau sindikatu (CFDT, CGT, Solidaires eta LAB), kilometroa elkarrekin egiteko prest. Kirolariak ere izango dira bertan, adibidez, Biarritz Olympique errugbi taldeko jokalariak, beraien jarraitzaileen buru den buruzagi indiarrarekin. Angelun elkartuko direnak, berriz, alderdi politikoak izango dira, 718. kilometroa egiteko. Han izango dira AB, Batasuna, EA, Berdeak, Modem, NPA, PC, PNB, PS eta UMP alderdiak. Eta kilometro batzuk aurrerago (725) Bordeleko Gau Eskolakoek Bretainiatik etorritako delegazioarekin batera egingo dute beren kilometroa. Ezin ahaztu bretoiek 2010eko maiatzean egingo dutela haien bigarren Korrika, Ar Redadeg izenekoa, eta horregatik bidali dute Korrikara hori antolatzen dabilen delegazio bat. Dena den, Ar Redadeg ekimenak 2.451 kilometroa ere egingo du Gasteizen Korrika 16ren amaieran. Lapurdiko hiriburuan ere hainbat kilometro egingo ditu Korrika 16k. Euskararen Erakunde Publikoko presidenteak eta langileek egingo dute bertako lehenengoa. Aviron Bayonnais errugbi taldeko jokalariek ere hartuko dute lekukoa euren maskota Pottokarekin batera. Eta aurtengo omenduek ere hartuko dute parte Baionan etorkin gehien biltzen diren auzoetan. Horrela, 733. kilometroa urtero egiten den Baionako Festibalekoek egingo dute, Hizkuntzen Festaren antolatzaileek. Lapurditik Nafarroa Beherea eta Zuberoara joko du Korrikak, bitartean elkarte anitzek erakutsiko diotelarik atxikimendua, esate baterako, Xiberoako jauna pastoralekoek, gauean Ündüreinen egingo duten kilometroan. Behin Maulera iritsita, berriro egingo du Korrikak mendebalderako itzulia, Donibane Garazi aldera, baina hara iritsi baino lehen egingo du bere kilometroa Euskal Herriko Laborantza Ganbarak ere, Ainhizen hain zuzen. Ondoren, Donibane Garazi, Baigorri, Luhuso, Itsasu... Itsasukoa da Korrika 16ren Bidaia intimoak dokumentaleko protagonistetako bat, AEK-ko irakasle Mixele hain juxtu, baina Mixelek ez du lekukorik eramango, lanean ibiliko baita Korrikaren furgonetan, beti lanean euskararen alde. Lapurdiko beste herri batzuk (Kanbo, Uztaritze, Senpere, Azkaine...) zeharkatu ondoren, Korrika 16k Iparraldea utziko du Saratik berriro Nafarroan sartzeko, oraingoan Beratik. Baina hori astelehen eguerdian izango da. Sat, 28 Mar 2009 22:38:09 +0100 http://korrika.org/index.php?name=News&file=article&sid=220 Izarren hautsa Korrikara Oreretara heldu berri gara kronika hau idazten. AEKko euskaltegian gaude. Bertoko lagunek harrera ederra egin digute. Eskertu egin diegu, zinez. Berandu ga­toz, eta gainera mankata, neka-neka eginda. Orain lau urte ere harrera ezin hobea egin ziguten, asteburua baliatuta, Korrikako lekukoaren atzetik genbiltzan Bilboko lagunei. Arratsaldeko lau eta erdiak aldera ailegatu ginen Hendaiatik, goseak amorraturik asfaltoa kiskali ostean. Korrika iristear zegoen herrira, dena zegoen itxita, jende guztia zain. Amore emateko zorian geundela, andrazko batek konpondu zigun dena. Bapo bazkaldu genuen ezorduan. Geroago jakin genuen emakume jatorra Lander Garro lagunaren ama zela. Baina atera gaitezen une batez Errenteriatik. Murgil gaitezen gaurko lasterketan. Gaua Pirinioetan barna ibili ostean (Aribe, Garralda…), goizeko bederatzietan sartu da Korrika Iruñera Arrosadiatik. Gu Sarasate Pasealekuan gaude esperoan. Jende mordoa dago. Carlos mutil perutarrarekin hitz egin dugu. Ederto egiten du euskaraz. Ez ditu alferrik bospasei Korrika egin. Gurasoekin eta Leninekin dago. Lenin Nikaraguakoa da, Carlos Fonseca FSLNren fundatzailea ezagutua. «Carlitos ez bezala hitz batzuk besterik ez dakizkit, baina hemen nago hizkuntza minorizatuen alde egin beharrean gaudelako». Entzierro elegantea paratu digute Iruñean. Festa ikusgarria. Oraingo honetan, baina, ez da adarkadarik. Gaztelu Plazatik Labrit Pilotalekura, Txantreatik Antsoainera edo Errotxapeatik Donibanera karrikak bete aldarri dauzkagu. Euskararen ofizialtasunaren aldeko oihuak erakunde publikoen zirrikituetatik sartu dira. Eta hantxe lotuko dira gotorturik, entzun behar duenak noiz kasu egin. Bien bitartean, korrikalari olde anitzak aurrera egin du, aldapan gora batzuetan, behera bestetzuetan, baina beti aurrera. Txileko familia batek eroan du lekukoa Txantrean (herri horretako beste batek Barañainen); auzo horretan bertan gizon mexikar batek hartu du; Kukuxumuxuren ardiak Errotxapean lagundu dio; Donibane auzoan dagoen kartzelatik pasatzean, Pello Santxez preso ohiak oinez egin du kilometroa, tipi-tapa, tipi-tapa. Milaka lagunek lagundu diote Korrikari Iruñean barna. Berriozarrerako bidean langile ugarik abegi egin diote Korrikari. Asko eta asko, jakin dugunez, Enplegua Erregulatzeko Espedienteak (ERE erdaraz) jasaten ari dira azken hilabeteetan. Nik neuk Juanito Irigoienekin berba egin dut. Sudur motzeko korrikalaria arnasestuka dabil, baina ez da gelditzen: «Langileok ERE, euskararen alde!». Emeki-emeki Irurtzunera ailegatu gara. Irurtzunen gara. Joseba ikusten dut, Oderizko laguna. Herriko dantzariekin sartu da. «Oderizko kilometroa Lekunberrira heldu baino lehen zagok». Urduri nago. Daborduko ez noa korrikalarien kadentzia lasaian, bihotza azeleratu egin zait. 447 kilometrora ailegatzean, Oderizko lagunak agertu zaizkit: Margarita, Peña, Akier… Orain arte Korrikan une hunkigarririk bizi izan badut, hauxe dut hunkigarriena. Atzoko kronikan adierazi nuenez, orain 20 urte inguru joan nintzen Larraun bailarako herri horretara euskara ikasten. Orduko hilabete horietan gertatu zitzaizkidanak ez ditut hona ekarriko. Bestela, Joxean Sagastizabal idazleak pentsatuko du Kutsidazu bidea, Ixabel liburua kopiatu nahi diodala. Zoritxarreko egun batean Aralarren sei ergitxe (txekor) galdu nituen arren, euskararekin egin nuen topo. Ongi etorri, Lutxin, esan dut nire artean. Eguneko unerik hunkigarriena Lekunberrin bertan ezagutu dugu. Atzo herriko ume bat hil zen. Korrikak musika amatatu du une batez. Errelebo bietako txalo zaparradak soilik entzun ditugu. Arratsalde partean iparrerantz egin dugu. Inguruko mendietan elurra ari du. Leitzara heldu gara. Ongi etorri! Goizuetarako bidea ez da samurra, baina gu poliki goaz, presa barik. Goizuetara apur bat atzeraturik heldu gara. Ongi etorri! Korri egin dugu eta Korrikako furgoneta-aldaketa baliaturik, Errenteriara etorri gara. Hemen barra-barra ari du euria. Hala ere giro ezin hobea dago kalean. Nabari da Korrika gaur ailegatuko dela. Lehenago, baina, Donostiara sartuko da gauerdian. Antigua auzoan omenaldia egingo diote Mikel Laboa zenari. Haren emazteak eta alabak eroango dute lekukoa eta hamahirugarren Korrikaren kanta entzungo da. Ongi etorri Mikel. LUTXO EGIA (Santander, 1969) Soziologian lizentziatua eta kazetaritzan aritua, e­gun literaturan dihardu. Hainbat ipuin eta poema ditu idatziak, baina gehienbat nobelan saiatu da. Horrela, Kalezuloko animalien izenak (Pamiela, 1999) haur literaturako poema liburuaz gain, Paperezko hegazkinak (Susa, 2002), Ezker hanka falta zuen (Susa, 2005) eta Zubigilea (Susa, 2007) nobelak argitaratu ditu. Nontzeberri.com kultura atariaren sortzailea ere bada. ­ Sat, 28 Mar 2009 22:32:27 +0100 http://korrika.org/index.php?name=News&file=article&sid=219 Bonaxera euskararen tropelera Ongi etorri Azkoien! Ongi etorri Faltzes! Azagratik Abaurreagainaraino ibili da gaur Korrika, behetik gora, hegotik iparrera, urratu elegantea egin diogu Nafarroari. Ongi etorri Kaparrotsu! Ongi etorri Pitillas! Goizeko hamaikak dira. Lerga, Eslava eta Oibarre utzi berri ditugu atzean. Ongi etorri! Landa zabal berdeak zeharkatzen ari gara. Munduko lehen eta azken gizakia sentitzen dugu geure burua aldi berean. Handian txiki, txikian handi, ez gaude ohituta honelako zeru infinituetara. Euskaldunok hala sentitzen gara behin baino gehiagotan. Batzuetan munduko azken gizajendea gara, arau legalak eta egoera soziolinguistikoak estuturik; beste batzuetan, aldiz, lehenak garela daukagu argi, pribilegiatu hutsak. Une honetan bezala. Eta, bidean aurrera, pentsatzen dugu inoiz ez garela orain bezain libre sentitu. ­Ongi etorri Xabi. Goizago ikusi dugu Astizko korrikalari peto hau, Erriberrin. Bihar ere ikusiko dugu Iruñean. Baita Larraun bailaran ere. Orain dela 20 urte ezagutu nuen Oderitz herri txikian. Euskara ikasten hartaratu nintzen. Eta orduz geroztik ez dugu elkar ikusi. Gaur, berriz, euskarak atzera ere elkartu gaitu, goranzko malda piko batean. Gogoko bidean aldaparik ez, ordea, dio esaera zaharrak. Eta horixe begitandu zaio Irune zangotzarrari Lergako mendatean. Pausoz pauso dabil, estilo dotorean, lekuko gora. «Euskararekin ere antzera nabil. Kaña handiagoa sartu behar diot». Irune haurdun dago. Luze gabe ume bi munduratuko ditu: Belai eta Lizara, biak ala biak mendiari loturiko izenak. Ongi etorri, bada! Zangotzara sartu aurretik eguneko errelebo musikalenak heldu dira La Pamplonesa udal-bandaren eskutik. Baita Iruñeko Arrano Elkarteko jubilatuen talde builatsuari esker! Jubilatuak? Sasoi hoberik! Txantreakoak, Arrosadiakoak…  korrika eroan datoz, kantuka eta dantzan. Ufaka? Bai zera! Zatopek maratoilari mitikoari inbidiarik ez hauek. Ongi etorri hunkidura. Ongi etorri Galipentzu! Herri honetan familia bereko lau belaunaldik egin dute korri. Ongi etorri Zangotza! Eguneko harrerarik jendetsuena ikusi dugu hemen. Haur zein edadeko, herritar guztiek bat egin dute Korrikarekin. Ongi etorri Irunberri! Ongi etorri Nabaskoize! Bonaxera euskararen tropelera, Barbara! Burgin batu zaigu. Adats luzea motots batean bildua daroa neska veneziar honek. Euskarazko hitz batzuk besterik ez dakizki. Baina ikasteko irrikan dago. «Buonasera?», galdetu dit. «Ez, bonaxera». Koldo Izagirreren Euskal Lokuzioak osatzera eta aberastera datorren Intza Proiektuan ageri da esamolde ederra: bonaxera egin. Antza denez, faire bonne chére-tik dator. «Bonaxera, orduan». Eta Erronkarirantz jarraitu du. Daborduko begien bistan dugu Pirinioetako elurra. Urzainkin lasterketaren beroak urtzeari ekin dio; zeharo lurmendu da Izaban. Ez goaz Belaguarantz. Ezkerretara hartu eta Abaurreagainara abiatu gara. Ongi etorri Uztarroze! Bonaxera Otsagabia! Bihar Korrika kaletartu egingo zaigu. Baina lehenago, gauez, Aribe, Garralda, Nagore, Urrotz eta beste herri batzuetako argiek erakutsiko dute bidea. LUTXO EGIA (Santander, 1969) Soziologian lizentziatua eta kazetaritzan aritua, e­gun literaturan dihardu. Hainbat ipuin eta poema ditu idatziak, baina gehienbat nobelan saiatu da. Horrela, Kalezuloko animalien izenak (Pamiela, 1999) haur literaturako poema liburuaz gain, Paperezko hegazkinak (Susa, 2002), Ezker hanka falta zuen (Susa, 2005) eta Zubigilea (Susa, 2007) nobelak argitaratu ditu. Nontzeberri.com kultura atariaren sortzailea ere bada. ­ Fri, 27 Mar 2009 22:00:59 +0100 http://korrika.org/index.php?name=News&file=article&sid=218 ­Larunbata Erremendia eta Abaurreagainaren artean hasiko du Korrika 16k, eta goizaldeko  orduetan Aezkoa eta Agoitz eskualdeak zeharkatuko ditu Iruñera iritsi aurretik. Inguru horretako elkarte, enpresa eta dendari askok hartuko dute parte Korrikan beraien kilometroa erosi eta korrituz. Era beran, Hiriberri, Orbaitzeta, Orotz, Luzaide, Agoitz eta Longidako Udalek eurek erositako kilometroak egingo dituzte, eta horiez gain, Abaurreagaina, Hiriberri, Lakabe eta Egueseko herritarrek ere kilometroak erosi dituzte. Bestalde, Agoitz aldean Itoizko urtegiak mehatxatutako herritarren plataformak ere eramango du lekukoa. Korrika Nafarroako hiribururako bidean Uharte eta Atarrabiatik pasatuko da, eta bertako Udalek eta herri mugimenduek, besteak beste, hartuko dute lekukoa. Burlatan, berriz, aurten Axular Elkartea bere 25. urteurrena ospatzen ari da, eta ospakizunen artean sartu du Korrika 16ren kilometro bat egitea. Hori goizeko zazpi eta erdiak aldera izango da, eta bederatziak baino lehen Behatokiak hartuko du lekukoa Mutiloa Goitin, Goiza Iruñean Arrosadiatik sartuko da Korrika 16 Iruñean, eta iruindarren artean pasatuko du goiza. Hamaika izango dira sostengua adieraziko dioten erakunde, alderdi politikoa, elkarte eta lagunak, besteak beste, Arrosadiako ikastola, Amaiur, San Fermin eta Jaso ikastolak, NaBai eta EA alderdiak, ezker abertzalea, Nafarroako Kooperatibak, Alde Zaharreko merkatariak... Ezin ahaztu, bestalde, Mutiko Alaiak, Los del Bronce eta San Fermin peñek, Zaldiko Maldiko elkartearekin batera, sostengua eta laguntza eskaini dituztela Korrika 16 Iruñetik igaro ondorengo jaia egiteko, Udalak horretarako jarritako oztopoen aurrean. Horrela, lau gune horietan eta, hurrenez hurren, triki-folk eta patxanga, roc-heavy, ska-reggae  eta punk giroez gozatzeko aukera izango dute bertaratzen diren guztiek. Rami Goizuetan Sakana aldera joko du gero Korrikak, edizio honetan lehenengo aldiz. Izan ere, berriro itzuliko da astearte eta ostegun goizaldean, eta azken egun horretan egingo ditu kilometro gehien bertan. Irurtzundik iparraldera joko du ondoren, Lekunberri eta Leitza aldera. Aurrera jarraituta, Goizuetara iristean, herriko lehen kilometroan hartuko du lekukoa Ramik, Jon Maiaren Bidaia Intimoak dokumentaleko protagonistetako batek. Berarekin batera, Nafarroako herri horretara iritsitako kanpotarrek egingo dute kilometroa, batzuk dagoeneko euskaldunak. Gainera, soinean beraien herriko jantzi tipikoak eramango dituzte. Donostian, Mikel Laboa gogoan Nafarroa utzi eta Gipuzkoa aldera joko du ondoren Korrikak. Hernaniko sarreran txistulariek eta dantzariek emango diote ongietorria Korrika 16ri, eta edizio honetako omenduek egingo dute herriko lehen kilometroa, hau da, kanpotik euskararen herrira etorri direnek. Martutene eta Loiola aldetik sartuko da Korrika Donostian, eta hirigunetik Antigua auzora joko du. Auzoko sarreran dagoen tunelaren inguruko 571. kilometroa hunkigarria izango da bereziki, Korrikak omenaldia eskainiko baitio utzi berri gaituen Mikel Laboari. Haren emazteak eta alabak eramango dute lekukoa, Korrikako furgonetetako bozgorailuetatik Mikel Laboak eta Ruper Ordorikak 13. Korrikarako abestu zuten kanta entzuten den bitartean. Kilometro amaieran Mikel Laboaren familiak Antiguako AEK-k eskainitako oparitxo bat jasoko du. Berrogeita hamar kilometro inguru egingo ditu Korrikak Donostian eta esku askotatik pasatuko da lekukoa, hauek erosi baitituzte, besteak beste, kilometroak: Erromatik Korrika 16ra etorri den koadrila italiar bat, ETBko Mihiluze saioko langileak, Aquariuma, hiri barruko autobusetako gidariak, Batzen Donostiako Euskalgintzaren Elkartea... Kai aldean Karmengo jaiak berreskuratzea lortu duen taldeak ere egingo du bere kilometroa, eta karramarro erraldoi batek eramango du lekukoa. Bestalde, edizio honetan Korrika Añorgatik pasatzen ez denez, Añorgako kultur eta kirol elkarteak eta Amassorrain ikastola Antiguara hurbilduko dira Korrikan parte hartzera. Iparralderako bidean Donostiatik Pasai Antxoko bidea hartuko du Korrikak, eta San Pedrora iristean, dagoeneko tradizio bihurtzen ari den moduan, txalupaz egingo du Pasai San Pedro eta Donibane arteko kilometroa. Oreretan, afal osteko Korrikitaun lehiaketan hartuko dute parte Korrikaren zain daudenek, eta hau herrira iristean zuzi artean emango diote ongietorria. Bidasoa aldean, berriz, traka handi batek hartuko du Korrika 16. Irungo Udalak lehendabiziko aldiz erosi du kilometroa, eta Eguzkitza Ikastetxeak eramango du lekukoa. Santiago zubiko kilometroa, azken urteetan ohi den moduan, AEK-k egingo du, eta edizio honetan ikasleei egokitu zaie lekukoa eramatea. Hendaiako Udalak ere erosi du kilometroa eta ikurrin erraldoi bat eta Korrikaren “ongi etorri” pankarta jarri ditu fatxadan. Hendaian, halaber, egingo dute beren kilometroa Pirritx eta Porrotx pailazoek ere, egun horretan ikuskizuna Hendaian dutela profitatuta. Emozioz beteriko eguna Korrika 16rentzat. Fri, 27 Mar 2009 21:12:19 +0100 http://korrika.org/index.php?name=News&file=article&sid=217 Tuterako zorupetik abiatu da Korrika "Lur-azpia eleanitza da hemen". Tuteran gara. Ordubete barru, bostak eta erdietan, hasiko da Korrika. Han-hemen ongietorriak eskaini gura dituen lasterraldia harrera polit baten bila bertaratu da. Eskaini eta jaso, noski. Jende andana dabil Herrerias kalean gora eta bera. Festa giroa da nagusi. Ibilbide luzean barna lagunduko digun Betagarriren kantak dantzatzera gomita dakar. Ongi etorri lagun… Goizean txalapartariek bakarrik isilarazi dute. "Aizu, lur-azpia eleanitza da hemen». Azal-zimurreko andrazko batek Tuterako arkeologia-lanak erakutsi dizkit. Emakume zahar honek aurpegian zenbat toles dituen ezin dut kalkulatu. Indusketetan nola, hala agertzen ditu pleguak. Lurrari begiratu diot. Aise ulertu ditut haren berbak. Kultura ugari bildu dira herri honetara mendeetan zehar, zorupe hau jakintsua da. «Eta lurra?», galdetu diot. «Lurra? Emankorra, ez al duzu Benitoren kanta entzun?". Olde handian bildu dira euskaltzaleak Herrerias kale honetara, bertokoak eta alboko herrietakoak gehienak. Andrazko meharra besterik gehitu gabe desagertu da. Desagertu, hitzez hitz. Aurre-aurreantxe neukan eta bat-batean aienatu da. Tas-Tas irratiaren deiaren zain nabilenez, Mercadal plaza luzera sartu naiz. Isiltasuna doinu da hemen. Betagarriren nota alaiak urrun sumatzen dira. Plazan Bibolinjolea estatua dago. «Hi ere mugituko haiz hau guztia hasten denean?», itaundu diot. Haur bi ditu begira-begira sorgindurik. Hark joko du abiatu aurretiko melodia, euskararen Hamelin. Eta hobe dauka, Korrika hasi bezain pronto Betagarriren haize-instrumentuak bilakatuko dira hauspo Gasteizeraino. Herrerias kalera bueltatu naiz arineketan. Hastear dago Korrika. Plazan kaleko arropaz jantziriko dantzari batzuek klarionaz marraztu dute irudizko ibilbidea. Orain oldarka, orain goxo, sentimenduak askatzen dituzte. Zer edo zer lehertzear dago. Hasiera orok haustura dakar aldean; eta hausturak etenik gabeko hasiera. Sentimenduen askatzea. Korrikalariak prest daude. Ongi etorri esan diot Marivi Lorenteri. Orain hogei urte inguru ekin zion ikasteari Tuterako euskaltegian. «Oso dibertigarria zen, oroipen ederrak gordetzen ditut». Durangon ere ikasi zuen. Begi argiak dituenez, begizuri esaten zioten Bizkaia aldean. Eta handik, Bilbotik, etorri dira Gontzal, Irati, Ekain eta Maider, euren ustez «bidaia egiteko modua» baita Korrika. Eta haiek bezala beste asko, ELA eta LAB sindikatuetako kideak kasu. Denak prest. Denak bihotzei eragiteko gertu. Sentitzeko irrikan. Hasi da festa. Batzuk San Adriango euskaltegira abiatu gara segituan. Gurekin eroan ditugu Korrika hasi aurretiko azken hitzak: «Erriberako herri guztietan haserretzen dira Korrika ez bada pasatzen" ­ LUTXO EGIA (Santander, 1969) Soziologian lizentziatua eta kazetaritzan aritua, e­gun literaturan dihardu. Hainbat ipuin eta poema ditu idatziak, baina gehienbat nobelan saiatu da. Horrela, Kalezuloko animalien izenak (Pamiela, 1999) haur literaturako poema liburuaz gain, Paperezko hegazkinak (Susa, 2002), Ezker hanka falta zuen (Susa, 2005) eta Zubigilea (Susa, 2007) nobelak argitaratu ditu. Nontzeberri.com kultura atariaren sortzailea ere bada. Thu, 26 Mar 2009 22:42:08 +0100 http://korrika.org/index.php?name=News&file=article&sid=216 ­­Korrika 16 dagoneko martxan da bere lehen kilometroak egiten. Edurne Brouard Korrika arduradunak mezua lekuko barruan sartu, “Alizia aurrera, Korrika!” agindua eman eta 2.503 kilometroko ibilbideari ekin dio euskararen lekukoak, Tuterako AEKren arduradun Alizia Iribarren eskuetan. Lehen  kilometroa bukatu baino lehen, eta Tuterako jaeietan egin ohi den “la revoltosa” dantzaren ohiturari eutsiz, plazako kioskoari hiru itzuli eman dizkio lekukoak. Bigarren kilometroa Argia Ikastolaren esku geratu da. Bostak aldera ekion diote hasiera ekitaldiari Tuterako Korrika Batzordeko kideek bertso artean, orain arteko Korrika guztietako bizkarrekoak jantzita zeramatzaten korrikalarien babesean. Ondoren, AEKren Artezkaritza Kontseiluko kide eta Nafarroako AEKren arduradun Aitziber Sarasolak ongietorria eman die Korrika 16ri eta Tuteran bildutako guztiei, Nafarroako Erriberan euskara ez dela ofiziala gogoratuz: “Euskal Herriko beste bazter batzuen antzera, Erriberan ere euskara borondate huts bat baino ez dela esan ohi digute, eta hala da momentuz. Hizkuntzaren ofizialtasuna lehenengo giltzarria da bere berreskurapenean”. Hala ere, “Tuterako euskaltegitik makina bat jende pasa da. Makina bat amets, gogo eta ilusio piztu da, eta nola ez, makina bat borroka egin behar izan da euskarari dagokion plaza emateko, Tuterak duen plazarik eta handiena”. Honela amaitu du bere hitzaldia: “Ongi etorri bezala, joan zaitez ongi Korrika. Ongi joan euskaraz bizi nahi dugunon herri honetatik, euskaraz bizi nahi duten beste herri guztietara”. Argazkiak, berriz, hemen daude ikusgai: http://www.flickr.com/photos/korrika16 Thu, 26 Mar 2009 19:47:12 +0100 http://korrika.org/index.php?name=News&file=article&sid=215 Ez da ezer falta Korrika 16k bere lehen urratsak eman ditzan, eta dena dago prest Tuteran. Edizio hau orain arteko luzeena izango da, Gasteizko Ama Zuriaren plazara iristean 2.503 kilometro beteko baititu. Ordurako euskararen lekukoa milaka eskutatik igaroa izango da, baina lehenengo kilometroan Alizia Iribarren Tuterako AEK-ko irakasleak eramango du. Korrikak euskarara etorri edo itzuli direnak omentzen ditu 16. edizio honetan eta Iribarren da horien eredu argietako bat. Elizondon familia euskaldun batean jaioa, Tuterara bizitzera joan behar izan zuen sendiarekin hamar urte zituenean, eta han galdu zuen ama hizkuntza. Baina bertan erabaki zuen berreskuratzea ere, eta gaur egun Tuterako AEK-ko arduraduna da. Alizia Iribarrenek, berriz, Argia ikastolako Elorri Askasibar neskatoari pasatuko dio lekukoa. Erribera euskaldunaren oraina eta geroa Korrika 16ren lehen kilometroetan. Dena dela, hori guztia 16. Korrika martxan jarritakoan izango da, baina bitartean izango da zer gozatu Nafarroako Erriberako hiriburuan. Goizean bertan hasiko dira jolasak, tailerrak eta puzgarriak Tuterako ikastolan, eta hamaiketan Atxikistan, Kanpanolue martxan lana antzeztuko du Eidabe taldeak. Eguerdi aldera jai giroa AEKren euskaltegia dagoen Herrerias kalera zabalduko da txupinazoarekin, eta hortik aurrera, herri bazkaria, jotak, zanpantzarrak... egongo dira giroa alaitzen. Arratsaldeko lauetan Kukai dantza taldeak Soka ikuskizuna eskainiko du, Korrikaren hasiera ekitaldiari bide eman baino lehen. Aitziber Sarasola AEKren Nafarroako arduradunak eta Edurne Brouard Korrika 16ren arduradunak emango diote hasiera aurretik 2.503 kilometro izango dituen Korrika 16ri. Herrian geratzen direnek, berriz, Trikizio taldearen kontzertuarekin gozatzeko aukera izango dute. Lehen kilometroak Esan bezala, Alizia Iribarrenek jarriko du lekukoa martxan Erribera euskalduneko geroaren esku uzteko, Argia ikastolako Elorri Askasibar ikaslearen eskuetan hain zuzen ere.  Korrika 16k Nafarroako Erriberan egingo ditu lehen eguneko kilometro guztiak eta inguruko hainbat herritar, erakunde eta gizarte eragilek hartuko dute euskararen lekukoa horien ondoren, besteak beste, Tuterako Beterri Peñak, Reina Sofía Ospitaleko langileek, Erriberako LAB sindikatuak, Tuterako gaiteroek, herriko suhiltzaileek eta Tuterako Hizkuntza Eskolako ikasleek. Behin Tutera atzean utzita, Kaskanten, adibidez, Erriberako ELA sindikatuak egingo du bere kilometroa; Kastejonen, Mendialde Ikastetxe Publikoak; eta Kadreitan, Donibane Peñak eta Jaso ikastolako langileek. Korrika 16 lau haizetara Erriberako nafarrek bezala, milaka eta milaka euskaldun eta euskaltzalek jarraituko dute Korrika 16ren ibilbidea, eta aukera handia egongo da horretarako. Karreran bertan joango den prentsa taldeak, bi argazkilari barne, zabalduko ditu lau haizetara ibilaldiko kontuak eta argazkiak. Hogei irratik baino gehiagok egingo dituzte egunero konexio zuzenak Korrikarekin karrerak iraungo duen hamaika egunetan, eta hainbat egunkarik eta aldizkarik eskainiko dizkiote beren orrialdeak. Korrika 16ren alde grafikoa ere ez da bazter geratuko, karrerako argazkiak Interneteko http://www.flickr.com/photos/korrika16 helbidean egongo baitira doan eskuratzeko moduan. Bideoak, berriz, Euskaltuben bilduko dira http://euskaltube.com/korrika16 helbidean. Eta, azkenik, Korrika 16ren www.korrika.org web-gunean Lutxo Egiaren lankidetza izango dugu. Idazle bizkaitarra karreran joango den prentsa-taldeko kide izango dugu Korrikaren edizio honetan, eta egunero idatziko du bertatik kronika txiki bat, Asfaltoaren arnasotsa izenburupean, gauero Korrikaren web-gunean jarriko dena. Soziologian lizentziatu eta kazetaritzan aritutako idazle gazte honek hainbat ipuin eta poema ditu idatziak, baina gehienbat nobelan saiatu da. Hala, Zubigilea (Susa, 2007) izenekoa da bere azken eleberria. Nontzeberri.com kultura atariaren sortzailea ere bada Egia, baina hurrengo egunotan, esan bezala, kazetari lanak egingo ditu Korrika 16ren prentsa taldean. Thu, 26 Mar 2009 09:25:55 +0100 http://korrika.org/index.php?name=News&file=article&sid=209 Jon Maia bertsolari eta idazleak hitza jarri dio Korrika 16ren kantari eta musikaz Betagarri taldea arduratu da. Ongi etorri lagun! abestiaren doinuak dantzagarriak dira, oso. ­Korrika Kulturalean gasteiztarre­n ska erritmoekin gozatzeko aukera izango dugu, kontzertu bi eskainiko dituzte eta.  Lehenengoa martxoaren 21ean, 22:00etan, Zizurren (pilotalekuan) eta bigarrena, apirilaren 5ean, Korrika 16ren azken eguneko jai erraldoian Gasteizen (Foru Plazan). Hamasei urte pasatu dira jada Betagarrik musika munduan bere lehenengo urratsak eman zituenetik eta hori dela eta, ibilbide luzea bezain emankorra bizi dute eta disko bilduma zabala daukate. Ongi etorri lagun, kantatu dezagun... Fri, 20 Mar 2009 00:50:57 +0100 http://korrika.org/index.php?name=News&file=article&sid=207 ­ Eusko Jaurlaritzako jarduneko lehendakari Juan ­Jose Ibarretxek gaur goizean (martxoa­ren 18an) AEK eta Korrikaren ordezkariak hartu ditu Ajuria ­Enean. Ibarretxek bere babesa adierazi dio Korrika 16ri eta Brouardek harekiko esker ona azaldu du horren “testuinguru politiko korapilotsuan” haiek hartzeko prest agertu izanagatik. Argazkian, jarduneko lehendakari Juan Jose Ibarretxerekin batera, Edurne Brouard, Mertxe Mugika, Asier Amondo eta Oskar Elizburu. Fri, 20 Mar 2009 00:47:07 +0100 http://korrika.org/index.php?name=News&file=article&sid=205 ­ A­tzo, martxoaren 17an, Arabako Foru Aldund­iko Euskara, Kultura eta Kirol Sailak bere babesa agertu zion Korrikari. Euskararen aldeko lasterketaren 16. edizio honetan Arabako Foru Aldundiak atxikimendua adierazi du estreinako aldiz eta Korrikan parte hartzeko deia egin die arabar guztiei. Argazkian Lorea López de Lacalle Euskara, Kultura eta Kirol diputatuarekin batera, Asier Amondo, AEK-ren zuzendaritzako kidea, eta Txus Argote, Korrikako Arabako arduraduna. Fri, 20 Mar 2009 00:39:17 +0100